تنوية : تلك التدوينة استثنائية , وقد لا يكون بها أي تفلسفسات أدبية كالمعتاد , انما هي نوع من عرض وجهه نظر في موضوع شائك ما ... ! ! ! ! ( انا باقول ايه ) ؟
دعك من ما قلته وركز في التدوينة .. وربنا يستر
لايك يا ولاد الحلال ! .. اضغط علي الزرار واعمل فيا معروف
الفيسبوك بيطلّع كل يوم اختراع جديد .. وافتكاسة جديدة تبوظ شكله وتخليه ازبل من الاول , كمثال : المزرعة الكئيبة ! .. ونظام التايم لاين اللي اثبت فشله بالنسبالي , لكن زرار ( اللايك ) هايفضل زرار عظيم , ومن أكتر اختراعات الفيسبوك نجاحاً
عارفين يعني ايه لايك ! .. لو تفضلت مشكورا وفتحت القاموس اللي انت أخدته مع كتب الوزارة بتاعت أولي ثانوي .. هاتلاقيه بيقولك ( يحب , علي سبيل المثال ) ... وده المعني المعروف - الأكاديمي - .. لكن علي الفيسبوك ممكن نديله أكتر من تعريف .. ( حب , احترام , انا باتابعك , انا مهتم بيك , انا باقرأ بوستاتك ) وحجات كتير تختلف من شخص لآخر
ماتيجي نعمل مقارنة بين شخصين
ـــــــــــــــــــــــــــــــــــــــ
رقم ( 1 ) .. الواد اللي مقطع السمكة وديلها
ــــــــــ
- يحطلك بوست هايف .. بوست ليه فايدة , تلاقي خمسين لايك !
- أي صورة عنده .. قبيحة كانت أم مش قبيحة ... مية لايك !
- غالبا بيبقي مدمن للفيسبوك .. ومش بيقوم من عليه
- ماتقدرش تصنفه تحت لائحة الدحيحة
رقم ( 2 ) .. الغلبان .. قلب أمه
ــــــــــــ
- وده بقي دايما هاتلاقيه بيعاني من أزمات متخشنفة مع نزيف حاد من الكآبه
- مش هاتلاقيه بيعد علي الفيس أصلا الا كل فين وفين
- لايك بالكتير .. وبيجيله كل شهر مرتين
- بيفشخ نفسه عشان يكتب حاجة حلوة ياخد عليها لايكات .. وبرضه
ممكن يكون الاختلاف نفسه من الشخصية نفسها اللي عاملة الاكونت , يعني حسب علاقاتك الشخصية مع الناس اللي انت ضايفهم .. لو انت من النوع اللي مش بيضيف ناس كتير , او مش بيحب يتعرف علي ناس جديدة .. أكيد مش هاتلاقي لايكات , لأنك مش بتضيف حد أصلا عشان يعملك لايك ... انما واحد تاني شغال الله ينور عمال يضيف في اللي يسوي واللي مايسواش - علي فكرة دي حاجة حلوة - وبيتعامل مع ده وده , وليه علاقات علي مستوي كبير .. وليه انشطة , اكيد هايلاقي ناس تعمله لايك ...
الصراحة الواحد اللي ماحدش بيعمله لايك ده انا مش عارف عايش في الدنيا ازاي ! .. او عامل اكونت ليه ! الفيسبوك بدون لايكات ما يساويش حاجة ... لأن الفيسبوك ليس الا تواصل اجتماعي , ولما ماحدش يعبرني في الجزمة بلايك يبقي مافيش تواصل , يبقي مالوش لزمة بقي الفيس ... انما الحمدلله ربنا رازقني بأكتر من واحد باموت فيهم جدا , وبيعملولي لايكات علي طول .. ربنا يخليهوملي يا رب ويفضلوا يعملوا لايكات كده علي طول
بس في نقطة مهمة أوي ... نقطة بايخة يعني ... انا دلوقتي عملت " مينشن " لواحد عشان يشوف التدوينة اللي انا كتبتها وفعلا شافها ! بس ماعبرنيش بلايك ولا كومنت حتي , وانا ساعتها اعرف انه ماشافهاش , فانا بقي اسأله واقوله : انت شوفت التدوينة ... يقولي آه دي جااااامدة فححت
طب طالما هيا جامدة ماعملتش لايك ليه يا تقيل ! .. اكتر حاجة بتضايقني في الواحد انه يكون بيتغطرس عليا , او مايحبش يعبر الناس , بتفرق معايا كتير أوي لما أكون انا عامل اهمية لواحد وفضلته هو وغيره عن الالفين اللي عندي .. ومايعبرنيش ! ومايحسسنيش بالاهمية عنده
الملخص المفيد عشان انا رغيت علي الفاضي ....
اهمية زرار اللايك
1- زرار اللايك بيحسس الانسان انه حاجة حلوة , حاجة الناس مهتمية بيها ,
2- هايبقي فيه تواصل اجتماعي بجد بينه وبين اللي عامله لايك ...
3- وياما شوفنا واحد حب واحدة من لايك :)) ..
4- وياما واحد اتعرف علي صاحب ليه من لايك
5- ممكن تبدأ مشروع مع واحد ... المشروع ده يكون بلايك
6- الدنيا تبقي لونها بمبي .. بلايك
ملحوظة هامة : .. بص بقي
ــــــــــــــــــــــــــــ
لو انت بقي شايف انك هاتبقي متكبر لو ماعملتش لايك لحد , فافتكر يابن آدم انه هايجي فيوم وماحدش هايعملك لايك .. وابقي ساعتها طبل علي الطرابيزة وقول يا ريت اللي جري ماكان ! ... يا بن الحلال " كما تدين تدان " اللايك اللي انت مستخصر تحطه لصاحبك , هايردهولك في يوم ... وهاتلاقيه عاملك انت كمان لايك .. لايك يا ولاد الحلال !
اعمل ليا فولو علي التويتر لو عجبتك
https://twitter.com/#!/YasserMar3ey
وضيفني علي الفيس اكرمك الله
https://www.facebook.com/YasserMar3ey
وماتنساش تعمل لايك بقي
ــــــــــــــــــــــــــــــــــ
وهاكونا مطاطا ,,,
