يختلف المعني اللغوي لكلمة " رجل " من شخص لآخر ... حسب تربيتك ,والبيئة اللي انت عايش فيها , أو المجتمع اللي انت بتختلط بيه , والناس اللي انت بتمشي معاهم ... هاتكون معني للرجولة ... سواء كان صح أو غلط , يعني مثلا الواد الصايع - لامؤاخذة - بيكوّن معني للرجولة وهو انه يعاكس بنات , وانه يمشي يأذي في خلق الله .. الخ , والواد ابن الناس المحترمة هاتلاقيه بيكون معني تاني للرجولة مناقض تماما للمعني اللي كونّنه الواد الصايع ... لذلك من مدونتنا دي , وفي سطور بسيطةوبدون مانطول عليكم نحب نلخصلكم المعني الكامل للرجولة .. وبرضه من وجهه نظري المتواضعة
ركز معايا كويس في الكلام ده ...
كيف تكون رجلا ؟ ... استرجل واشرب بريل
- مافيش راجل بيلبس سلسلة .. امال سيبتوا ايه للبنات ؟
- الراجل مش بيعلي صوته علي صوت أبوه وأمه " ان انكر الاصوات لصوت الحمير " .. يا حمار
- مش بيرخم علي مدرسينه في الفصل ويبجح فيهم
- بيمشي في الشارع وهو راجل وملوي هدومه وراسه مرفوعة لفوق
- مش بيعاكس بنات الناس
- بنطلونه علي وسطه .. مش تحت وسطه ! ... مش بيسقط البنطلون يعني
- الراجل هاتلاقيه دايما ليه هدف في الحياة .. وان ماكنش ليه هدف .. هاتلاقيه دايما بيحاول يبقي ليه هدف عشان يعيش ويوصله في النهاية
- مسئول عن اللي بيعمله , وعارف ان الحاجة لو بيعملها في السر تبقي غلط .. ولو قصاد الناس يبقي مافيهاش حاجة , لو حاجة غلط بيعملها قصاد الناس هايتعلم منها ويبعد عنها
- بيحاول يبقي عنده شخصيه , ليه مكانه في وسط الناس , وليه قيمته
- ممكن يتبع الموضة .. لكن في الصح والسليم .. مش أي عك وخلاص
- مش بيشتم ! .. عشان مايعرضش نفسه للاهانة , لأنه بيحاول يحافظ علي كرامته
- مش بيحط نفسه في موقف انه يعمل خناقة مع واحد ... لأن الرجولة مش اني اضربك أو ابقي اجمد منك ..لأ .. الرجولة اني بالعقل ماحطش نفسي في الموقف اللي يخليني اتأذي فيه
- بيحاول يخلي كل يوم في حياته أحسن من اليوم اللي قبله .. واليوم اللي بعده أحسن من اليوم اللي هو عايشه انهارده ... بيطور من نفسه
- مش بيدخن , وممكن تلاقيه بيدخن .. بس هاتلاقيه عايز يموت ويبطل السجاير اللي بيشربها
- مش بيبقي " قمعة " لرأي حد .. رأيه هو اللي مكونه من خلال الافكار اللي بيسمعها
- لو شاف حاجة وحشه , أو موقف غلط ... تلاقيه بيحاول يصلحه
- مش هاتلاقيه ماشي ورا بنت بيعاكسها أو بيهتك عرضها ... لأنه عارف ان الكلاب هما اللي بيعملوا كده لما بيلهثوا وبيطلعوا لسانهم .. وهايموتوا ويعضوك وينهشوا لحمك
- الراجل مش هايف , مش تافه .. أو دماغه فاضيه ... اما تلاقيه في مذاكرته أو في المشاريع اللي بيعملها .. أو في الفكرة اللي بيحاول ينميها جوه عقله
- بيتعلم من كل شخصيه يقابلها .. ويحاول ياخد منها ميزة
- نفسه يبقي جامع لكل الصفات الحلوة .. وكل الهوايات
- مش بيحب يشوف حد أحسن منه في حاجة وبيتضايق من نفسه أوي
- مش مشكلة لما تحب ... أي حد بقي صاحبك أو اخواتك أو مامتك أو بباك .. أو اي حد بقي
ــــــــــــــــــــــــــــــــــــــــــــــ
أظن كده كفاية .. لو انت شايف ان في حاجة غلط في اللي قلتها يا ريت تقولولي
ودي برضه من وجهه نظري الشخصية .. أو اللي انا شايفه
مش شرط تكون جامع لكل الصفات دي .. انما بتحاول تجمعها
ويارب ان شاء الله تكون عاجباك التدوينة دي
وبرضه هاعيد وارخم عليكم
اقولكم ..والنبي اعمل لايك للتدوينة
واعملي فولو علي تويتر
وضيفني علي الفيس
وشوف القناة بتاعتي علي اليوتيوب
وهاكونا مطاطا ... شكرا ليكم :))
