ليه تشتم أونكل وطنط ؟ .. اشتمه هو لو عايز تحرق دمه

انا مش باكتب بالعامية كتير ... بس ادينا بنحاول نجرب من كله
ــــــــــــــــــــــــــــــــــــــــــــــــــــــــ

مشكلة وهاناقشها .. ونحاول نطلع بحل

عندنا مشاكل كتير في المجتمع بتاعنا , معظمها مشاكل ناتجه عن التربية والاخلاق اللي اتربينا عليها في السبع سنين الاولي اللي بيبدأ الانسان يكتسب العادات من بيته ومن مجتمعه , المشاكل دي بنحاول نحلها مع بعض بس بمنطلق تاني .. وهو اني شاب زيي زيك , وعايزين نبقي كلها حلوين مع بعض ...  عشان البلد الخرابة اللي احنا عايشين فيها تبقي حاجة في المستقبل .. حاجة يتنظر ليها مش حاجة يتنفر منها .. يعني علي سبيل المثال :

تلاقي فيه شباب بيشتم بعضه بالاب والام , و غالبا بيكون هزار  ! ..

 ( يا سنه سوده )

 هيا مشكلة كبيرة جدا والمجتمع بيحاول يحلها ,

 من خلال مثلا التلفزيون المصري واعلاناته الموقرة !

 او من خلال المدارس اللي مافيش حد بيحضر فيها ...

  او بيبقي حديث واحد للتاني بيحاول يهديه ويرشده للصواب , 

لكن في التلت وسائل دول , بنلاقي ان النقاش كله بيندمج تحت الجانب الديني فقط ! .. يعني تلاقي الاستاذ بيكلم التلميذ عن الدين بيقول ايه , واضرار ده ونتيجته الحتميه اللي هاتيجي علي دماغه .. كل ده مطلوب ولازم يتعمل

بس فيه مشكلة كبيرة جدا ..

 هيا ان المجتمع بتاعنا اصلا بعيد كل البعد عن ربنا , ولما بتيجي تكلم حد في الدين الي حد كبير بينفر منك ومش بيتقبل منك النصيحة , وده مش افتراء علي فكرة !.. لا , ده كلام صحيح وعن تجربة شخصية ... 

الموضوع كله ممكن يتحل بالعقل ..

 وزي مابيكدبه علينا وبيقوللنا ان الطفل المصري اذكي طفل في العالم

يبقي ممكن ناخد بالعقل خطوة للامام عشان نحل مشاكلنا ,

 يعني لو هانتكلم عن موضوع الشتايم  

, هو فيه سؤال بيراودني علي طول لما باسمع اي شتيمة زي دي :

 هو ايه دخل طنط بالموضوع ! ..

 وأونكل عمل ايه عشان يتشتم ؟ ..

 طب ماتشتمه هو يا جدع ؟ ..

 هو اللي هبب العمله الطين دي .. يعني هو اللي يتشتم !

   الشتيمة ليهم مالهاش لزمة ومش هاتفيدك بحاجة , ولو انت عايز تحرق دم اهله , فهو هايرد عليك انت كمان وهايحرق دم اللي جابوك , يعني انت كمان خسران 

ده في حالة ان كان ده بيحرق دمك فعلا .. 

انما لو انت اصلا متعود علي كده وعلاقتك بطنط وأونكل :) حضيض وزي الطين وكلها ضرب بالشباشب والخراطيم , فأكيد الموضوع بالنسبالك مش فارق , وانك هاتكون فرحان انهم يتشتموا عشان تعوض الضرب اللي بتاخده ودي برضه ( بلوة سودة ) ... 

وهنا ممكن نلجأ للجانب الديني بس يبقي من الاساس والمصدر .. ونبدأ لنحلله مشاكله من البداية خالص .. وايه اللي خلاه يوصل للمرحله دي .. انه مايبقاش فارق معاه دين ولا منطق ولا عقل ! 

في نقطة كمان ..

 ان الواحد بيفتكر انه لما يقول كلمة زي دي , يبقي واد فتوة  , وظاهر قصاد اصحابه - صحاب السوء - علي انه الليدر بتاعهم والواد البرنس يعني ! ...

 يمكن تكون فعلا الفتك بتاعهم , وظاهر أوي .. ومقطع السمكة وديلها ,

بس اعرف ان الشكل اللي انت بتتصوره ده بيكون للخمسة اصحابك بس

 , وان باقي المجتمع بيبصلك علي انك حقير , وانك ولا حاجة , 

لذلك ... حاول تظهر للناس , بس بحاجة حلوة تبقي اضافة ليك 

, وتعلي من نظرة الناس لشخصيتك

عموما .. نأمل في ربنا خير , 

وطالما احن قمنا بثورة لسه ماتنيلتش كملت 

, وهانفضل وراها لحد مانجّحها 

ونقيم دولة نظيفة بأخلاق نظيفة وبتعليم نظيف , 

يبقي ان شاء الله كل ده هايزول مع الوقت ..

وهاكونا مطاطا